ભાવનગરની સ્મોલ વંડર સ્કૂલ ખાતે બાળકોએ નાતાલની સાદાઈપૂર્વક ઉજવણી કરી : બાળકો દ્વારા અવનવાં ડ્રેસકોડ પહેરી ડાન્સ પાર્ટી કરીને ઉજવણી કરવામાં આવી : કોરોનાના કારણે શહેર-જિલ્લામાં સાદાઈથી ઉજવણી કરવામાં આવી રહી છે
૨૫ ડિસેમ્બરે ખ્રિસ્તી સમાજ દ્વારા નાતાલ પર્વની ઉજવમી કરવામાં આવી છે આ નિમિત્તે શહેરના વિઠ્ઠલવાડી સ્થિત સીએનઆઈ ચર્ચ ખાતે રાત્રીના ઉજવણી કરવામાં આવી હતી અને આજે સવારે ચર્ચમાં ખ્રિસ્તી સમાજના ભાઈઓ-બહેનો દ્વારા સમુહ પ્રાર્થના સહિતના ધાર્મિક કાર્યક્રમો કરાયા હતા. અને એક બીજાને ક્રિસમસની શુભેચ્છા પાઠવી હતી. ભાવનગર શહેરના વિદ્યાનગર ખાતે આવેલી સ્મોલ વંડર સ્કૂલ ખાતે નાના બાળકો દ્વારા ક્રિસમસના તહેવારની ઉજવણી કરવામાં આવી હતી.
જેમાં બાળકો દ્વારા અવનવાં ડ્રેસકોડ પહેરી ડાન્સ પાર્ટી કરીને ઉજવણી કરવામાં આવી હતી અને બાળકોને સાન્ટા ક્લોઝ દ્વારા રિટર્ન ગિફ્ટ આપવામાં આવી હતી. આજે શનિવારે નાતાલની ઉજવણી ઠેરઠેર કરવામાં આવી રહી છે, ક્રિસમસના તહેવારે ભાવનગર શહેરના એમ.જી.રોડ, પીરછલ્લા શેરી, વોરાબજાર તેમજ વાઘાવાડી રોડ સહિતના અનેક સ્થળોએ ઠેર-ઠેર ક્રિસમસ સંબંધિત સાન્ટા કેપ, ટ્રી અને ડ્રેસ સહિતની એસેસરીઝનું ધૂમ વેચાણ શરૂ થઈ ચૂક્યું છે. ગત વર્ષની જેમ આ વર્ષે પણ કોરોનાની મહામારીના કારણે ભાવનગર શહેર અને જિલ્લામાં ક્રિસમસની સાદાઈથી ઉજવણી કરવામાં આવી રહી છે, કોરોનાની મહામારીના કારણે અન્ય તહેવારોની જેમ ૨૦૨૧ના વર્ષના અંતિમ તહેવાર નાતાલની પણ સાદાઈથી ઉજવણી કરવામાં આવી રહી છે. નોંધનીય છે કે આ ઉજવણી એક અઠવાડિયા સુધી ચાલશે, જેમાં ભાવનગરમાં આવેલી શાળાઓ અને ચર્ચમાં સરકારની સંપૂર્ણ કોરોના ગાઈડ લાઈન પ્રમાણે ઉજવણી કરવામાં આવી રહી છે.
