અમદાવાદ,તા.૭
યુઝવેન્દ્ર ચહલે એક ખાસ રેકોર્ડ પોતાના નામે કર્યો છે. તેણે વન-ડેમાં ૧૦૦ વિકેટ પૂરી કરી છે. અગાઉ ભારતીય લેગ-સ્પિનરો પૈકી માત્ર અનિલ કુંબલે જ વન-ડે ક્રિકેટમાં ૧૦૦થી વધુ વિકેટો હાંસલ કરી શક્યા છે. હવે ચહલ દેશનો બીજો લેગ સ્પિનર ??બની ગયો છે, જેના ખાતામાં ૧૦૦થી વધુ વન-ડે વિકેટ છે. ચહલે આ પરાક્રમ ભારત-વેસ્ટ ઈન્ડિઝની પ્રથમ વન-ડેમાં કર્યું હતું. તેણે માત્ર ૯ બોલમાં ૩ વિકેટ લઈને વેસ્ટ ઈન્ડિઝને બેક ફૂટ પર ધકેલી દીધું હતું. યુઝવેન્દ્ર ચહલ તેની પ્રથમ ઓવરના ત્રીજા બોલ પર નિકોલસ પૂરન (૧૮)ને એલબીડબલ્યુ આઉટ કર્યો હતો. આ સાથે તેની ૧૦૦ વિકેટ પૂરી થઈ ગઈ. આગામી બોલ પર તેણે કેપ્ટન કિરન પોલાર્ડ (૦)ને બોલ્ડ કરીને વિન્ડીઝને મોટો ઝટકો આપ્યો હતો. બીજી ઓવરના ૫માં બોલ પર ચહલે શેમરાહ બ્રુક્સ (૧૦)ને વિકેટકીપર રિષભ પંતના હાથે કેચ આઉટ કરાવ્યો હતો. અગાઉ દક્ષિણ આફ્રિકામાં ચહલનું પ્રદર્શન સારું રહ્યું ન હતું. પરંતુ ઘરઆંગણે તેણે મેચમાં લય મેળવી લીધી છે. ભારતીય સ્પિન બોલરોની વાત કરીએ તો યુઝવેન્દ્ર ચહલ ૧૦૦ વિકેટનો આંકડો પાર કરનાર ૯મો ભારતીય બન્યો છે. ભારત માટે સૌથી વધુ વન-ડે વિકેટ લેવાનો રેકોર્ડ અનિલ કુંબલેના નામે છે.
તેમણે ૨૬૯ વન-ડે મેચોમાં ૩૩૪ વિકેટ પોતાના નામે કરી છે. સ્પિનર ??તરીકે હરભજન સિંહ ૨૬૫ વિકેટ સાથે બીજા નંબર પર છે. આ બે સિવાય અન્ય કોઈ ભારતીય સ્પિનરે ૨૦૦ વિકેટનો આંકડો સ્પર્શ કર્યો નથી. આ સિવાય રવીન્દ્ર જાડેજા (૧૮૮), સચિન તેંડુલકર (૧૫૪), આર અશ્વિન (૧૫૧), રવિ શાસ્ત્રી (૧૨૯), યુવરાજ સિંહ (૧૧૦) અને કુલદીપ યાદવે (૧૦૭) પણ ભારતીય સ્પિનરો તરીકે વનડેમાં ૧૦૦ વિકેટ ઝડપી છે.
