પાલીતાણામાં પેટ્રોલપંપના કર્મચારી પર ત્રણ શખ્સોએ હુમલો કરી લૂંટ ચલાવી

પોલીસે સીસીટીવી ફૂટેજના આધારે લૂંટારૂઓ વિરુદ્ધ ગુનો નોંધી તપાસ હાથ ધરી
ભાવનગર જિલ્લાના પાલીતાણા-તળાજા રોડપર આવેલા એક પેટ્રોલપંપ પર ત્રણ અજાણ્યા શખ્સોએ પેટ્રોલ પુરાવવાના બહાને આવી પંપ ફિલર પર હુમલો કર્યો હતો. જે બાદ રોકડ રકમની લૂંટ ચલાવી નાસી છુટ્યા હતાં. આ સમગ્ર બનાવ અંગે પાલીતાણા પોલીસ મથકેથી જાણવા મળતી વિગતો અનુસાર પાલીતાણા-તળાજા હાઈવે પર નેહા પેટ્રોલિયમ નામે એક પંપ આવેલો છે. આ પંપ પર આજે સવારે ત્રણ અજાણ્યા શખ્સો બાઈકમા પેટ્રોલ પુરાવા માટે આવ્યા હતા. આ દરમિયાન આ ત્રણેય શખ્સોએ ફિલર-કર્મચારી કુલદીપ રાજપૂત પર હુમલો કરી તેના ખીસામાં રહેલ રોકડા રૂપિયા 6 હજારની લૂંટ ચલાવી નાસી છુટ્યા હતાં. આ લૂંટારૂઓની કરતૂતો પંપ પર લાગેલા સીસીટીવી કેમેરામાં આબાદ કેદ થઈ હતી. આ અંગે પાલીતાણા રૂરલ પોલીસને જાણ કરાતાં પોલીસ કાફલો ઘટના સ્થળે દોડી આવ્યો હતો અને કર્મચારી એ નોધાવેલી ફરીયાદ તથા સીસીટીવી ફૂટેજના આધારે અજાણ્યા લૂંટારૂઓ વિરુદ્ધ ગુનો નોંધી તપાસ હાથ ધરી છે.