વડાપ્રધાને રાષ્ટ્રીય રક્ષા યુનિવર્સિટીના પદવીદાન સમારોહમાં ભાગ લીધો : છાત્રોને મેડલ એનાયત કર્યા : ટેક્નોલોજીથી અવગત હોય, નવી પેઢી સાથે વાતચીત કરવાની ક્ષમતા ધરાવતો હોય તેવો ટ્રેઈન્ડ મેનપાવર હોવો જરુરી
ગાંધીનગર, તા.૧૨
ગુજરાત પ્રવાસના બીજા દિવસે દહેગામમાં રોડ શો કર્યા બાદ પીએમ મોદીએ આજે રાષ્ટ્રીય રક્ષા શક્તિ યુનિવર્સિટીના પદવીદાન સમારંભમાં હિસ્સો લીધો હતો. અહીં વિદ્યાર્થીઓને સંબોધતા પીએમે જણાવ્યું હતું કે, રક્ષાનું ક્ષેત્ર ખૂબ જ વિસ્તૃત છે અને તેમાં વેલ ટ્રેઈન્ડ મેન પાવર સમયની માગ છે. ૨૧મી સદીમાં આ ક્ષેત્રમાં જે પડકાર આવવાના છે તેને અનુરુપ આપણી વ્યવસ્થા વિકસિત થાય અને તેને સંભાળનારા વ્યક્તિત્વનો પણ વિકાસ થાય તે હેતુથી રાષ્ટ્રીય રક્ષા યુનિ.ની સ્થાપના કરવામાં આવી છે. પીએમે જણાવ્યું હતું કે, આ ક્ષેત્ર દેશની સેવા કરવાનું એક મહત્વનું ક્ષેત્ર છે. પીએમે જણાવ્યું હતું કે, આજનો દિવસ સ્ટૂડન્ટ્સ, વાલીઓ અને ટીચર્સ માટે ખૂબ જ મહત્વનો તો છે જ, પરંતુ સાથે મારા માટે પણ એક યાદગાર અવસર છે. જે કલ્પના સાથે આ યુનિવર્સિટીનો જન્મ થયો હતો તેની પાછળ એક લાંબી વિચારપ્રક્રિયા સામેલ હતી. ખાસ્સી મથામણ બાદ આ યુનિ.નું એક નાનકડું સ્વરુપ ગુજરાતની ધરતી પર આકાર લઈ શક્યું હતું. અંગ્રેજોના સમયમાં આ ક્ષેત્ર એક રુટિન કામનો હિસ્સો હતું, અને કદ કાઠી ધરાવતા લોકોને તેમાં નોકરીએ રાખવામાં આવતા હતા જેમનું કામ એક પ્રકારે ભારતીયો પર ડંડો ચલાવવાનું હતું. જોકે, આઝાદી બાદ તેમાં આમૂલ પરિવર્તનની આવશ્યકતા હતી, પરંતુ દુર્ભાગ્યથી દેશમાં તે દિશામાં જરુર અનુસાર કામ ના થઈ શક્યું. જેના કારણે આજે પણ પોલીસ વિષેની એવી અવધારણા પ્રવર્તે છે કે તેમનાથી બચીને રહેવું, તેમનાથી દૂર રહેવું. સેનાના જવાનો પણ યુનિફોર્મમાં હોય છે, પરંતુ તેમના પ્રત્યેની માનસિકતા અલગ છે. તેવામાં ભારતમાં સામાન્ય માણસના મનમાં એક વિશ્વાસની અનુભૂતિ કરાવે તેવા મેન પાવરને લાવવાની જરુરિયાત હતી. આજે રક્ષાનો મતલબ યુનિફોર્મ, પાવર કે હાથમાં ડંડાનો નથી. આ ક્ષેત્રએ આજે અનેક નવા રંગરુપ ધારણ કર્યા છે. તેની સામેના પડકારો પણ વધ્યા છે. આજે સેકન્ડોમાં સ્થિતિ બદલાઈ જાય છે તેવામાં ટેક્નોલોજીથી અવગત હોય, નવી પેઢી સાથે વાતચીત કરવાની ક્ષમતા ધરાવતો હોય તેવો ટ્રેઈન્ડ મેનપાવર હોવો જરુરી છે. લોકતંત્રમાં જનતાને સર્વોપરી માની અસામાજીક તત્વો પર સખ્તાઈ અને સમાજના લોકો પ્રત્યે નરમાઈની માનસિકતા કેળવવી જરુરી છે. આપણા દેશનું દુર્ભાગ્ય છે કે ફિલ્મો અને અખબારોમાં સૌથી ભદ્દો ચહેરો પોલીસવાળાનો જ રજૂ કરવામાં આવે છે. જેના લીધે સમાજમાં પોલીસની જે છબી સમાજ સમક્ષ રજૂ થવી જોઈએ તે નથી થઈ શકી. જોકે, સોશિયલ મીડિયામાં કોરોનાકાળ દરમિયાન પોલીસે કરેલી સારી કામગીરી દર્શાવતા વિડીયો વાયરલ થયા, અને પોલીસના માનવીય ચહેરાથી સામાન્ય લોકો અવગત થયો હતો, પરંતુ હવે આ ટ્રેન્ડ અટકી ગયો છે. હવે સામાજીક માળખું બદલાતા જવાનોમાં સ્ટ્રેસનું પ્રમાણ વધી રહ્યું છે, ત્યારે સ્ટ્રેસ ફ્રી એક્ટિવિટીની ટ્રેઈનિંગ જરુરી બની છે. ત્યારે રક્ષા શક્તિ યુનિ. એવા ટ્રેઈનર પણ તૈયાર કરી શકશે કે જે પોલીસકર્મીઓ, સેનાના જવાનોને સ્ટ્રેસ ફ્રી રાખવામાં સક્રિય ભૂમિકા અદા કરી શકશે. તે જ રીતે ટેક્નોલોજી સાાથે અવગત રહેવું પણ રક્ષા ક્ષેત્રના લોકો સાથે એટલું જ જરુરી છે.
જે પ્રકારે સાયબર સિક્યોરિટી એક મોટો ઈશ્યૂ બની રહી છે, અને ક્રાઈમમાં ટેક્નોલોજીનો ઉપયોગ વધી રહ્યો છે ત્યારે ક્રાઈમ સોલ્વ કરવામાં પણ ટેક્નોલોજી ઉપયોગી બની રહી છે. જોકે, યોગ્ય વ્યક્તિના હાથમાં યોગ્ય હથિયાર અને સમય પર કામ કરવાનું સામર્થ્ય કેળવવું ટ્રેઈનિંગ વિના શક્ય નથી. પીએમે કેદીઓ સારા મનુષ્ય બનાવી જેલમાંથી બહાર નીકળે તે માટે પણ કાર્ય કરી શકે તેવા લોકોને તૈયાર કરવા માટે પણ રાષ્ટ્રીય રક્ષા યુનિ.ને હાંકલ કરી હતી.
