ભાવનગર જિલ્લા જેલમાંથી છ આરોપીને લઈ બોટાદ કોર્ટ તરફ પોલીસ વાનમાં જતા હતા ત્યારે વલ્ભીપુર નજીક ભારે વરસાદના કારણે વાન પ્લટી ખાઈ જતાં જ પોલીસ કર્મી અને છ આરોપીને નાની-મોટી ઈજાઓ થવા પામી હતી.
પ્રાપ્ત વિગત મુજબ ભાવનગર પોલીસ હેડકવાર્ટરના પી.એસ.આઈ. એમ.એન.ડાંગર દ્વારા વલ્લભીપુર પોલીસમાં જાણ કરાઈ હતી કે સવારના સમયે જિલ્લા જેલમાંથી છ આરોપીને લઈ પોલીસવાનમાં બોટાદ કોર્ટે જતા હતા ત્યારે વલ્ભીપુરથી બે કી.મી. દુર સામેથી આવી રહેલ ટ્રક સાથે અકસ્માત ન થાય તે માટે ડ્રાઈવરે વાન રોડ નીચે ઉતારી દેતાં વરસાદના કારણે ભીની માટી થવાથી ગાડી સ્લીપ થઈ જતાં ગાડીએ પલ્ટી ખાધી હતી. બનાવમાં વાનમાં સવાર છ પોલીસ કર્મચારી અને છ આરોપીને નાની-મોટી ઈજાઓ થતાં સારવાર અર્થે વલ્ભીપુરના સરકારી દવાખાને ખસેડાયા હતાં. જયાં તમામ સ્થિતિ સાધારણ હોવાનું જાણવા મળ્યું હતું.
