શહેરના કાળીયાબીડ ભગવતી સર્કલ નજીક બપોરના સમયે એકટીવા અને બાઈક વચ્ચે ધડાકાભેર અકસ્માત સર્જાતા એકટીવા પર સવાર વિદ્યાર્થીનીનું કરૂણ મોત નિપજવા પામ્યું હતું.
બનાવની મળતી વિગતો મુજબ, શહેર નજીકના અકવાડા ગામે રહેતા ઉપેનભાઈ મકવાણાની પુત્રી માનસીબેન મકવાણા ઉ.વ.૧૯ જે નંદકુંવરબા મહિલા કોલેજમાં બીજા વર્ષમાં અભ્યાસ કરે છે. આજે બપોરના સમયે કોલેજ પૂર્ણ કરી એકટીવા સ્કુટર પર ઘરે પરત જતા હતા ત્યારે સામેથી પુરપાટ ઝડપે આવી રહેલા બાઈકના ચાલકે ધડાકાભેર અકસ્માત સર્જાતા માનસીબેનને લોહીયાળ ઈજાઓ સાથે સારવાર અર્થે સર ટી. હોસ્પિટલ ખસેડાયા હતા. જ્યાં ફરજ પરના તબીબે તપાસી મૃત જાહેર કર્યા હતા. બનાવની જાણ થતા કોળી સમાજના આગેવાનો સહિત સર ટી. હોસ્પિટલ દોડી ગયા હતા. બનાવ બનતા પરિવારજનોમાં ભારે શોક છવાઈ જવા પામ્યો હતો.
