કોંગ્રેસ અધ્યક્ષ રાહુલ ગાંધીએ પોતાના દિવંગત પિતા રાજીવ ગાંધી પર પ્રહારો કરતાં પીએમ મોદીને વળતો જવાબ આપ્યો છે. વડાપ્રધાન પર પ્રહારો કરતાં કોંગ્રેસ અધ્યક્ષે કહ્યું કે લડાઇ ખત્મ થઇ ચૂકી છે. તેમના પિતા પર કરાયેલા પ્રહારો પણ તેમને (નરેન્દ્ર મોદી) બચાવી શકશે નહીં. આની પહેલાં પીએમ મોદીએ શનિવારના રોજ એક ચૂંટણી રેલીમાં નામ લીધા વગર રાજીવ ગાંધી પર પ્રહારો કર્યા હતા.
રાહુલ ગાંધીએ ટ્વીટ કરી, ‘મોદીજી લડાઇ ખત્મ થઇ ચૂકી છે. તમારા કર્મ તમારી રાહ જોઇ રહ્યા છે. તમારી આંતરિક વિચારસરણીને મારા પિતા પર થોપવાથી પણ તમને બચાવી શકાશે નહીં. સપ્રેમ અને ઝપ્પી સાથે-રાહુલ’
વડાપ્રધાન નરેન્દ્ર મોદી શનિવારના રોજ એક ચૂંટણી રેલીમાં બોફોર્સ કૌભાંડની તરફ ઇશારો કરતાં પૂર્વ વડાપ્રધાન રાજીવ ગાંધી પર નામ લીધા વગર પ્રહારો કર્યા હતા. મોદીએ કહ્યું હતું કે તમારા (રાહુલ ગાંધી) પિતાજીને તમારા રાજ દરબાદીઓએ મિસ્ટર ક્લીન બનાવી દીધા હતા. પરંતુ જોત જોતામાં ભ્રષ્ટાચારી નંબર વન તરીકે તેમનો જીવનકાળ સમાપ્ત થઇ ગયો. નામદાર આ અહંકાર તમને ખાઇ જશે.
આ દેશ ભૂલોને માફ કરે છે, પરંતુ છેતરપિંડી કરનારને કયારેય માફ કરતો નથી.
