અમદાવાદ શહેરમાં પ૦ માઇક્રોનથી નાની ઝભલાં થેલી પર પ્રતિબંધ મુકાયો હોવા છતાં તેનો છેલ્લા કેટલાક મહિનાથી છૂટથી ઉપયોગ થઇ રહ્યો છે. પ્રતિબંધિત પ્લાસ્ટિકના બેરોકટોક થતા ઉપયોગથી મ્યુનિસિપલ સત્તાવાળાઓ પણ ચોંકી ઊઠ્યા હોઇ આ મામલે કસૂરવારો સામે વ્યાપક દંડનીય કાર્યવાહી હાથ ધરાઇ છે. હવે તંત્ર સિંગલ યુઝ પ્લાસ્ટિકના વપરાશ સામે લાલ આંખ કરશે.
મ્યુનિસિપલ સત્તાવાળાઓ દ્વારા પ્લાસ્ટિકના ચાના કપ, ઝભલાં થેલી, અને પાન-મસાલાના રેપર પર પ્રતિંબધ મુકાયો હોવા છતાં શાક માર્કેટ, ફરસાણ, કરિયાણાની દુકાનો, ડેરી, ચાની કીટલીઓ, પાન પાર્લરો વગેરે સ્થળોએ છૂટથી તેનો ઉપયોગ થવા સામે હવે આકરી કાર્યવાહી થઇ રહી છે. ગત તા.૬ થી૧ર મે સુધીમાં તંત્રના સોલિડ વેસ્ટ મેનેજમેન્ટ દ્વારા પ્રતિબંધિત પ્લાસ્ટિકના મામલે ૧૦૦૦ લોકોને નોટિસ ફટકારી રૂ.પ.૯પ લાખનો વહીવટી ચાર્જ ફટકારાયો હતો. તેમજ રર૪ કિલો પ્રતિબંધિત પ્લાસ્ટિકનો જથ્થો જપ્ત કરાતાં આવા પ્લાસ્ટિકનું ઉત્પાદન, વેચાણ અને ઉપયોગ કરતા ધંધાર્થીઓમાં ફરી ફફડાટ ફેલાઇ ગયો છે.
હવે સત્તાવાળાઓએ પ૦ માઇક્રોનથી પાતળા પ્રતિબંધિત પ્લાસ્ટિકના વપરાશ સામેની ઝુંબેશની સો સાથે સિંગલ યુઝ પ્લાસ્ટિક હેઠળ તમામ પ્રકારની કેરી બેગ, પ્લાસ્ટિક સ્ટ્રો, ચા-પાણી અને જ્યૂસના પ્લાસ્ટિક કપ, પ્લાસ્ટિક નાઇફ, પ્લાસ્ટિક ફોર્ક, પ્લાસ્ટિક સ્પૂૂન અને લંચ પેક કે ડિનર પેકમાં વપરાતી પ્લાસ્ટિકની થાળીના ઉપયોગ, વેચાણ અને ઉત્પાદન પર પ્રતિબંધિત હોઇ આના વપરાશકર્તા, સંગ્રાહકો અને ઉત્પાદકો સામે ભારે દંડાત્મક કાર્યવાહી કરાશે.
