અમદાવાદના નારોલ વિસ્તારમાં આવેલા કર્ણાવતી એપાર્ટમેન્ટ વનમાં કરંટ લાગવાના કારણે નવ વર્ષીય બાળકનું ઘટનાસ્થળે મોત નીપજ્યું છે. નવ વર્ષનો જૈમીન ભાવસાર એપાર્ટમેન્ટમાં રમતો હતો તે સમય દરમ્યાન સોસાયટીની સ્ટ્રીટ લાઈટ પાસે જમીનમાંથી કરંટ લાગતા જૈમીનનું ઘટનાસ્થળે મૃત્યુ થયું હતું.
આ ઘટનાને લઇને સ્થાનિકોનો આક્ષેપ છે કે, અગાઉ પણ સોસાયટીમાં આવી ઘટનાઓ બની ચૂકી છે. સોસાયટીના ચેરમેન અને ટોરેન્ટ પાવર દ્વારા વાતને ધ્યાનમાં લેવામાં આવે અને ફરીથી આવી ઘટના ના બને તે માટે અપીલ પણ કરવામાં આવી છે. જૈમીનના પરિવારજનોમાં ત્રણ બહેનો વચ્ચે માત્ર એક નાનો ભાઈ હતો તેને લઈને હાલ તો પરિવારજનોમાં શોકની લાગણી જોવા મળી રહી છે.
