ગાંધીનગરમાં એક પછી એક ચોરીના અંજામ આપતા તસ્કરોએ હવે સેક્ટર-૬માં ગ-૨ કોર્નર પર ચાર દુકાનોના તાળા તુટ્યા છે. અહીં આવેલા સુરભી કોમ્પ્લેક્ષમાં આવેલ શિવ ફોટો સ્ટુડિયો, અર્બન એન્જિનિયરિંગ, સાયોના ઈલેક્ટ્રીકલ અને ઉમિયા ટ્રેડર્સને તસ્કરોએ નિશાન બનાવી છે.
સવારે ૮ વાગ્યે કોમ્પ્લેક્ષના એક વેપારી પહોંચ્યા ત્યારે તસ્કરો હાથફેરો કરી ગયા હોવાનું લાગતા અન્ય વેપારીઓને જાણ કરી હતી. ચારેય દુકાનોનો સામાન વિરવિખેર હતો જેમાં શિવ સ્ટુડિયોમાંથી ૩ હજારની મત્તા ગઈ છે જ્યારે અન્ય દુકાનોમાં કાઉન્ટરમાં પડેલા થોડાઘણા પૈસા ગયા હોવાનું સામે આવ્યું હતું. ઘટના અંગે જાણ કરાતા સેક્ટર-૭ પોલીસની ટીમ ઘટના સ્થળે પહોંચીને ફિંગરપ્રિન્ટ એક્સપર્ટની મદદથી તપાસ કરી હતી. જોકે, બહુ મોટી રકમની ચોરી ન થઈ હોવાથી આ અંગે કોઈ ફરિયાદ નોંધાઈ નથી. જોકે, પોલીસે જરૂરી નોંધ કરીને આંતરિક રીતે તપાસ શરૂ કરી છે. એક સાથે ચાર દુકાનના તાળા તૂટતા આસપાસના વેપારીઓમાં ફફડાટ ફેલાઈ ગયો છે.
