ભારતીય ક્રિકેટ ટીમના કેપ્ટન વિરાટ કોહલીએ તેની યશકલકીમાં વધુ એક મોરપીછુ ઉમેરી લીધુ છે. કોહલી હવે વેસ્ટ ઇન્ડિઝની સામે વનડે આંતરરાષ્ટ્રીય મેચમાં સૌથી વધારે રન બનાવનાર ખેલાડી બની ગયો છે. કોહલી એક પછી એક રેકોર્ડ પોતાના નામ પર કરી રહ્યો છે. રવિવારના દિવસે પોર્ટ ઓફ સ્પેન ખાતે રમાયેલી શ્રેણીની બીજી મેચમાં કોહલીએ આ સિદ્ધી હાંસલ કરી હતી. કોહલીએ વેસ્ટ ઇન્ડિઝની સીમે હવે ૨૦૩૨ રન બનાવી લીધા છે. વેસ્ટ ઇન્ડિઝની સામે પાકિસ્તાનના જાવેદ મિયાદાદે ૬૪ મેચમાં ૬૪ ઇનિગ્સ રમીને ૩૩.૮૫ રનની સરેરાશ સાથે ૧૯૩૦ રન બનાવી લીધા છે. જેમાં એક સદી અને ૧૨ અડધી સદીનો સમાવેશ થાય છે. મિયાદાદે વિન્ડીઝની સામે પોતાની છેલ્લી મેચ ૧૯૯૩માં રમી હતી. બીજી બાજુ આ મેચ પહેલા ભારતીય કેપ્ટન વિરાટ કોહલીએ વેસ્ટ ઇન્ડિઝની સામે ૩૩ ઇનિગ્સમાં ૭૦ રનની સરેરાશ સાથે ૧૯૧૨ રન બનાવ્યા હતા. કોહલીએ વેસ્ટ ઇન્ડિઝની સામે વનડે મેચમાં સાત સદી અને ૧૦ અડધી સદી કરી છે. વેસ્ટ ઇન્ડિઝની સામે સૌથી વધારે વનડે રનની વાત કરવામાં આવે તો માર્ક વોગ ત્રીજા સ્થાન પર છે. માર્ક વોગે ૧૭૦૮ રન બનાવ્યા છે. જેક કાલિસે ૧૬૬૬ રન બનાવ્યા છે. પાકિસ્તાનના રમીઝ રાજાએ પણ વેસ્ટ ઇન્ડિઝની સામે જોરદાર બેટિંગ કરી હતી. રમીજ રાજાએ ૧૬૨૪ રન કર્યા હતા. ભારતની વાત કરવામાં આવે તો સચિન પણ સામેલ છે. દ્રવિડ પણ યાદીમાં સામેલ છે. જાવેદ મિયાદાદે વેસ્ટઇન્ડિઝ સામે અગાઉ સૌથી વધારે રન બનાવ્યા હતા. આજ કારણસર જાવેદ મિયાંદાદને દુનિયાના સૌથી સારા ખેલાડી પૈકી એક તરીકે ગણવામાં આવે છે. વિન્ડિઝની ટીમ સામે રમવામાં જ્યારે વિશ્વના સારા બેટ્સમેનો પણ ધ્રુજી જતા હતા ત્યારે જાવેદ મિયાંદાદે દુનિયાના અન્ય બેટ્સમેનોની સરખામણીમાં સૌથી વધુ રન બનાવ્યા હતા. આજે પણ જાવેદ મિયાંદાદની બેટિંગની યુવાનો નોંધ લેતા હોય છે. વિરાટ કોહલીએ જાવેદ મિયાંદાદના રેકોર્ડને તોડ્યો છે પરંતુ વિન્ડિઝની ટીમ હવે દુનિયાની સૌથી નબળી ટીમો પૈકીની એક તરીકે રહી છે. યાદીમાં રાહુલ દ્રવિડ અને સચિન તેંડુલકર પણ રહ્યા છે. રાહુલે વિન્ડિઝ સામે ૧૩૪૮ રન કર્યા છે.
