ચુંટણીમાં બીએલઓ તરીકે કામગીરી કરતાં શિક્ષકોને આ કામગીરી ઓનલાઇન કરવા માટે આજે સેક્ટર-૧૨ સ્થિત બીઆરસી ભવન ખાતે કેમ્પ રાખવામાં આવ્યો હતો. જેમાં ગાંધીનગર તાલુકાના શિક્ષકો ઉપસ્થિત રહ્યા હતાં પરંતુ બીએલઓની કામગીરી ઓનલાઇન કરવામાં શિક્ષકોને રસ નહીં હોવાના કારણે મોટાભાગના શિક્ષકો આ કેમ્પમાંથી ભાગી ગયા હતા.
ચુંટણીને લગતી મોટાભાગની કામગીરી શિક્ષકો દ્વારા થતી હોય છે. બીએલઓની મહત્વની કામગીરી પણ આ શિક્ષકોના માથે હોય છે. ત્યારે સરકાર દ્વારા હવે બીએલઓની તમામ કામગીરી ઓનલાઇન કરવાનું વિચારી રહી છે. જે માટે શિક્ષકોને તાલીમ આપવા પુર્વે તેમને માર્ગદર્શન કેન્દ્ર સરકાર દ્વારા બાયસેક મારફતે આજે આપવામાં આવ્યું હતું. ગાંધીનગર ઉત્તર વિધાનસભા બેઠક માટે શિક્ષકોનો આ માર્ગદર્શન કેમ્પ સેક્ટર-૧૨ સ્થિત બીઆરસી ભવન ખાતે રાખવામાં આવ્યો હતો.
જેમાં મામલતદાર દ્વારા ઉપસ્થિત શિક્ષકોને વિવિધ કામગીરી અંગે માહિતગાર કરવામાં આવ્યા હતા. ત્યારે શિક્ષકોને હવે બીએલઓની કામગીરી પણ ઓનલાઇન કરવાનું કહેવામાં આવતાં શિક્ષકો રોષે ભરાયા હતા અને તેઓ બીએલઓની કામગીરી કરવા માટે સક્ષમ નહીં હોવાનું જણાવી ત્યાંથી નીકળી ગયા હતા. થોડીકવારમાં તો મોટાભાગના શિક્ષકો આ કેમ્પ છોડીને ચાલ્યા ગયા હતા અને ખાલી ખુરશીઓ રહી ગઇ હતી.
