ભારતીય મહિલા શૂટર યશસ્વિની સિંહ દેસવાલે બ્રાઝીલમાં યોજાયેલા આઈએસએસએફ વર્લ્ડ કપમાં ૧૦ મીટર એર પિસ્ટલમાં ભારતને ગોલ્ડ મેડલ અપાવ્યો હતો. ભારતના ખાતામાં આ ત્રીજો ગોલ્ડ મેડલ રહ્યો હતો. ફાઈનલમાં યશસ્વિનીએ ૨૦૦૪ની ઓલિમ્પિક ચેમ્પિયન યુક્રેનની ઓલેના કોસ્તેવિચને પરાસ્ત કરી હતી. આ સાથે જ ઓલિમ્પિકમાં પોતાનું સ્થાન મેળવનાર ભારતની નવમી શૂટર બની ગઈ છે. યશસ્વિનીએ પોતાની કારકિર્દીનો આ પ્રથમ ગોલ્ડ જીત્યો છે. આ અગાઉ અંજુમ મૌદ્દગિલ, અપૂર્વી ચંદેલા, સૌરભ ચૌધરી, અભિષેક વર્મા, દિવ્યાંશ સિંહ, રાહી સરનોબર, સંજીવ રાજપૂત અને મનુ ભાકરે ઓલિમ્પિકમાં ક્વોટા મેળવ્યો હતો.
ભારત શૂટિંગ વર્લ્ડ કપમાં ત્રણ ગોલ્ડ, એક સિલ્વર તેમજ એક બ્રોન્ઝ સાથે પોઈન્ટ ટેબલમાં પ્રથમ સ્થાને છે. યશસ્વિની અગાઉ અભિષેક વર્મા અને મહિલા શૂટર ઈલોવેનિલ વાલારિવાને ભારતને ગોલ્ડ અપાવ્યો હતો.
૨૨ વર્ષીય પૂર્વ જૂનિયર વર્લ્ડ ચેમ્પિયન યશસ્વિનીએ ફાઈનલમાં આઠ મહિલાઓ પૈકી ૨૩૬.૭નો સ્કોર કર્યો હતો. વર્લ્ડ રેન્કિંગ નંબર વન કોસ્તેવિચને સિલ્વર તેમજ સર્બિયાની જૈસમિના મિલાવોનોવિચને બ્રોન્ઝ મેડલ મળ્યો હતો. કોસ્તેવિચનનો સ્કોર ૨૩૪.૮ હતો જ્યારે મિલાવોનોવિચન સ્કોર ૨૧૫.૭ રહ્યો હતો. યશસ્વિની ક્વોલિફાઈંગ રાઉન્ડમાં ૫૮૨ પોઈન્ટ સાથે પ્રથમ સ્થાને રહી હતી.
