અમદાવાદના અમરાઇવાડી વિસ્તારમાં ગુરૂવારે બપોરે એકાએક ત્રણ માળનું એક મકાન ધરાશાયી થતાં જ અફરાતફી મચી જવા પામી હતી. આ દુર્ઘટનામાં ૭ જેટલા લોકો દટાયા હતા. જો કે, આ ઘટનાને પગલે ફાયર સહિતની ટીમો સ્થળ પર આવી પહોંચી છે અને બાચવ કામગીરી હાથ ધરવામાં આવી છે. મકાનના કાટમાળમાં દટાયેલા ૪ લોકોને ફાયર ટીમ દ્વારા બચાવી લેવામાં આવ્યા હતા. સમાચાર લખાઈ રહ્યા છે ત્યારે ૨ વ્યક્તિનાં મોત થયું હોવાનું જાણવવામાં આવી રહ્યું છે.પ્રાપ્ત માહિતી અનુસાર, શહેરના અમરાઇવાડી વિસ્તારમાં બંગલાવાળી ગલીમાં આવેલું એક જર્જરીત મકાન એકાએક ધસી પડ્યું હતું. આ ઘટનાને પગલે આસપાસના મકાનો પણ ખાલી કરાવી દેવામાં આવ્યા છે. જ્યાં આ મકાન આવેલું છે એ ગલી સાંકડી હોવાથી બચાવ કામગીરીમાં પણ ભારે મુશ્કેલી પડી રહી છે. તો સાથે સાથે સ્થાનિક લોકો પણ બચાવ કામગીરીમાં જોડાઇ ગયા છે.
જો કે, આ કાટમાળમાં ૭ લોકો દટાયા હતા જેમાંથી ફાયર ટીમ દ્વારા ૪ લોકોને બચાવીને સારવાર માટે એલજી હોસ્પિટલ ખસેડવામાં આવ્યા છે. ત્યારે આ ઘટનામાં બે વ્યક્તિઓના મોત થયા છે અને તેમના મૃતદેહોને પીએમ અર્થે ખસેડવામાં આવ્યા છે. તો આ મકાનના કાટમાળમાં હજી પણ ૧ વ્યક્તિ દટાયા હોવાનું સામે આવી રહ્યું છે. જેને લઇને ફાયર ટીમ દ્વારા યુદ્ધના ધોરણે બચાવ કામગીરી ચલાવવામાં આવી રહી છે.
અમરાઇવાડી વિસ્તારમાં એકાએક મકાન ધરાશાયી થવાની આ ઘટનાને પગલે આસપાસના લોકો દોડી આવતા બચાવ કામગીરીમાં ભારે મુશ્કલી પડી રહી હતી. જો કે, ઘટનાની જાણ થયા બાદ ઘટના સ્થળે પહોંચા પોલીસ કાફલાએ ભીડ પર કાબૂ મેળવ્યો હતો.
