ટેલિવિઝન અને ફિલ્મ ઇન્ડસ્ટ્રીમાં પોતાનું સ્થાન બનાવ્યા બાદ હિના ખાન હવે ડિજિટલ પ્લેટફોર્મ પર પણ એન્ટ્રી લઇ રહી છે. હિના ખાન ‘ડેમેજ્ડ- ૨’ નામની વેબ સિરીઝથી ડિજિયલ ડેબ્યુ કરવાની છે. ઓનલાઇન સ્ટ્રીમિંગ પ્લેટફોર્મ ‘હંગામા પ્લે’ પર રિલીઝ થનારી આ વેબ સિરીઝમાં તે શેખર સુમનના દીકરા અધ્યયન સુમન સાથે જોવા મળશે.
આ વેબ સિરીઝમાં હિના ખાન ગૌરી બત્રાના રોલમાં છે જે એક ગેસ્ટહાઉસની ઓનર છે અને તે ઘણા રાઝ સંગ્રહીને બેઠી હોય છે. અધ્યયન સુમન આકાશ બત્રાના રોલમાં છે જે ગેસ્ટહાઉસનો કો-ઓનર છે. આ ‘ડેમેજ્ડ’ સિરીઝની બીજી સીઝન છે જે સુપરનેચરલ એલિમેન્ટ્સ સાથેનો સાયકોલોજિકલ ક્રાઇમ ડ્રામા છે. આ સિરીઝને એકાંત બબાની ડિરેક્ટ કરવાના છે.
હિના ખાને આ શોને લઈને પોતાની ઉત્સુકતા જતાવતાં કહ્યું કે, ‘હું ડેમ્જ્ડ ૨નો હિસ્સો બનવા માટે ઘણી ઉત્સાહિત છું. રોલની વાત કરું તો આ ઘણો અલગ અને પડકારજનક છે. મને વિશ્વાસ છે કે આ વેબ શો જ્યારે રિલીઝ થશે ત્યારે ઓડિયન્સને તેને જોવામાં મજા પડશે.’ અધ્યયન સુમને કહ્યું કે, ‘આ ડ્રામા,રોમાંચ અને સુપરનેચરલ એલિમેન્ટનું અજોડ કોમ્બિનેશન છે.’
