ભારતીય મૂળના અર્જુન બંસલ અને અંકિતિ બોઝે ફોર્ચ્યૂનની ૪૦ અંડર ૪૦ ગ્લોબલ લિસ્ટમાં જગ્યા બનાવી છે. અર્જુન અમેરિકાની ટેક કંપની ઇન્ટેલના આર્ટિફિશયલ ઇન્ટેલીજન્સ સોફ્ટવેર એન્ડ એઆઇ લેબના વાઇસ પ્રેસિડન્ટ છે. અંકિતિ ફેશન પ્લેટફોર્મ જિલિંગોની સીઇઓ અને કો-ફાઉન્ડર છે.
ફોર્ચ્યૂન મુજબ, અર્જુનની ટીમમાં ૧૦૦ લોકો છે જે અમેરિકા, ઇઝરાયેલ અને પોલેન્ડમાં ઇન્ટેલના એઆઇનું કામ જુએ છે. ઇન્ટેલના પ્રમુખ એઆઇ પ્રોજેક્ટમાં અર્જુનના સ્ટાર્ટઅપ નેરવાના દ્વારા તૈયાર કરાયેલી વિશેષ કમ્પ્યૂટર ચીપ પણ સામેલ છે. ઇન્ટેલે ૨૦૧૬માં ૩૫ કરોડ ડોલર (હાલ ૨૪૮૫ કરોડ રૂપિયા)માં નેરવાનાને ખરીદી હતી.
અંકિતિએ ચાર વર્ષ પહેલા જિલિંગોની શરૂઆત કરી હતી. જિલિંગો દક્ષિણ-પૂર્વ એશિયાના નાના વેપારીઓને તેમના ઉત્પાદનો વેચવા માટે ઓનલાઇન પ્લેટફોર્મ ઉપલબ્ધ કરાવે છે. કંપનીનું હેડક્વાર્ટર સિંગોપોરમાં છે.જિલિંગોએ ફેબ્રુઆરીમાં ૧,૬૦૪.૬ કરોડ રૂપિયાનું ફન્ડિંગ મેળવ્યું હતું. કંપનીનું વેલ્યુએશન એક અબજ ડોલરની નજીક છે. ફોર્ચ્યૂનની યાદીમાં ૪૦ માંથી ૧૯ મહિલાઓ છે. આમાં એમેઝોનની વોઇસ યુઝર ઇન્ટરફેસ ડિઝાઇનર એલીસન એટવેલ અને પેપ્સીકોની બબલી બ્રાન્ડની ડાયરેક્ટર ઓફ માર્કેટિંગ મૈરિસા બાર્ટનિંગ પણ સામેલ છે.
