ઉત્તરાખંડ ભાજપે મંગળવારે ચાર કાર્યકરો અને હોદ્દેદારોને રાજ્યમાં પંચાયત ચૂંટણીમાં પક્ષ વિરોધી પ્રવૃતિ કરવા બદલ હાંકી કાઢ્યા હતા. પ્રદેશ ભાજપના મહાસચિવ રાજેન્દ્ર ભંડારીએ ભાજપ પ્રદેશ પ્રમુખ અજય ભટ્ટના નિર્દેશો મુજબ ચાર કાર્યકરોને પક્ષમાં હકાલપટ્ટી કરતો પત્ર ઈશ્યૂ કર્યો હતો.
દહેરાદૂન જિલ્લાના ભાજપના મહિલા મોરચા અધ્યક્ષ માયા પંતની પણ પક્ષમાંથી હકાલપટ્ટી કરવામાં આવી છે. આ સાથે જ ઉત્તરાખંડમાં ભાજપમાંથી કુલ હાંકી કાઢવામાં આવેલા કાર્યકરોની સંખ્યા ૯૪ થઈ છે જેમાં ભાજપના મીડિયા ઈન્ચાર્જ દેવેન્દ્ર ભસીનનો પણ સમાવેશ થાય છે.
પંચાયતની ચૂંટણીમાં ભાજપ સમર્થીત ઉમેદવારની વિરુદ્ધ કામગીરી કરવા બદલ ભાજપે પક્ષમાંથા આ કાર્યકરોને હાંકી કાઠ્યા હતા. ભાજપના પ્રદેશ પ્રમુખ અને નૈનિતાલના સાંસદ અજય ભટ્ટે જણાવ્યું કે શીસ્ત એ પક્ષની સૌથી પ્રમુખ પ્રાથમિકતા છે અને જે પણ લોકો તેનું ઉલ્લંઘન કરશે તેમની વિરુદ્ધ કડક કાર્યવાહી કરાશે.
પ્રદેશ ભાજપે દહેરાદૂનના રાયપુરના ધારાસભ્ય ઉમેશ શર્મા કાઉને પણ આ પ્રકારની પ્રવૃતિ બદલ નોટિસ પાઠવી છે અને ત્રણ દિવસમાં જવાબ રજૂ કરવા આદેશ કર્યો છે. કાઉને ૬ ઓક્ટોબરના નોટિસ પાઠવવામાં આવી હતી. એક ઓડિય ક્લિપ વાઈરલ થઈ હતી જેમાં કાઉ અપક્ષ ઉમેદવાર માટે વોટ માંગતા હોવાનો દાવો કરાયો હતો.
