મિસ વર્લ્ડ ૨૦૧૭ માનુષી છિલ્લર ઐતિહાસિક ડ્રામા ફિલ્મ પૃથ્વીરાજ મારફતે બોલીવુડમાં એન્ટ્રી કરવા જઈ રહી છે. આ ફિલ્મમાં તેની સાથે અક્ષયકુમાર મુખ્ય ભૂમિકા અદા કરવા માટે તૈયાર છે. તાજેતરમાં જ ચંદ્રપ્રકાશ દ્વિવેદીના નિર્દેશન હેઠળ બની રહેલી આ ફિલ્મમાં ગીત ઉપર શૂટિંગ કરવામાં આવ્યું હતું. આ ફિલ્મમાં મિસ વર્લ્ડ ૨૦૧૭ માનુષી છિલ્લર સંયોગિતાના રુપમાં નજરે પડનાર છે. જ્યારે અક્ષયકુમાર આ ફિલ્મમાં પૃથ્વીરાજની ભૂમિકામાં નજરે પડનાર છે. માનુષી છિલ્લરે હાલમાં જ પોતાની લાઇફની યાદગાર ક્ષણ માણી હતી. કારણ કે, તે વખતે ફિલ્મના ગીતનું શૂટિંગ કરવામાં આવ્યું હતું. તેનું કહેવું છે કે, શૂટિંગ અને રિહર્સલ તેના માટે નવા અનુભવ તરીકે છે. તેનું કહેવું છે કે, પ્રથમ ફિલ્મમાં શુટિંગને લઇને પણ તે ખુશ છે. માનુષી છિલ્લર બોલીવુડમાં પોતાની કેરિયરને લઇને આશાવાદી દેખાઈ રહી છે. વિતેલા વર્ષોમાં પણ મિસ વર્લ્ડ અને મિસ યુનિવર્સ રહી ચુકેલી યુવતીઓ બોલીવુડમાં ભારે લોકપ્રિયતા મેળવી ચુકી છે જેમાં એશ્વર્યા રાય બચ્ચન, પ્રિયંકા ચોપડા, લારા દત્તાનો સમાવેશ થાય છે. મિસ યુનિવર્સ રહી ચુકેલી સુસ્મિતા સેન પણ બોલીવુડમાં સફળતા હાંસલ કરી ચુકી છે. હવે માનુષી છિલ્લર પણ બોલીવુડમાં જોરદાર એન્ટ્રી કરવા માટે તૈયાર છે. આ ફિલ્મમાં તેની સાથે અક્ષયકુમાર હોવાથી આ ફિલ્મ પહેલાથી જ સુપરહિટ રહેવાની શક્યતા રહેલી છે. ફિલ્મનું શૂટિંગ ઝડપથી ચાલી રહ્યું છે. વહેલીતકે શૂટિંગ પૂર્ણ કરવામાં આવનાર છે. જો કે, ફિલ્મની રજૂઆતની તારીખ હજુ સુધી જાહેર કરવામાં આવી નથી. આગામી વર્ષે આ ફિલ્મ રજૂ થાય તેવી શક્યતા વ્યક્ત કરવામાં આવી રહી છે. બોલીવુડમાં તેની પાસેથી જોરદાર દેખાવની અપેક્ષા રાખવામાં આવી રહી છે.
