પાલીતાણા-માલપરા ગામ વચ્ચે બપોરના સુમારે રપ વ્યક્તિ ભરેલી મેજીક રીક્ષા પ્રવેશદ્વાર સાથે અથડાતા આઠથી વધુ વ્યક્તિને ઈજાઓ થવા પામી હતી. જેમાં બેની હાલત ગંભીર હોવાનું જાણવા મળ્યું હતું.
પ્રાપ્ત વિગત મુજબ પાલીતાણાથી ત્રણ કિલોમીટર દુર આદીદિપ જૈન મંદિર પાસે માલપરા ગામ નજીક મેજીક રીક્ષા ધડાકાભેર પ્રવેશદ્વાર સાથે અથડાઈ હતી અને પલ્ટી ખાઈ ગઈ હતી. રીક્ષામાં સવાર ઠળીયા ગામના રપ વ્યક્તિમાંથી ૮ વ્યક્તિઓને નાની-મોટી ઈજાઓ થવા પામી હતી. જેમાં બેની સ્થિતિ ગંભીર હોવાનું જાણવા મળ્યું હતું. બનાવની જાણ થતા ૧૦૮ સેવા તુરંત બનાવ સ્થળે દોડી જઈ ઈજાગ્રસ્તોને સારવાર અર્થે માનસિંહજી હોસ્પિટલ ખસેડાયા હતા. બનાવ અંગે પાલીતાણા રૂરલ પોલીસે જરૂરી કેસ કાગળો કરી વધુ તપાસ હાથ ધરી છે.
