(સં. સ.સે.) નવી દિલ્હી, તા. ૧૪
ભારત અને એશિયાના બીજા ક્રમાંકના સૌથી ધનિક વ્યક્તિ ગૌતમ અદાણીના નેતૃત્વ વાળી કંપની અદાણી ગ્રુપ માટે એક માઠા સમાચાર છે. નેશનલ સિક્યોરિટીઝ ડિપોઝિટરી લિમિટેડ દ્વારા ત્રણ વિદેશી ફંડ્સ Albula Investment Fund, Cresta Fund y™u APMS Investment Fund™ના અકાઉન્ટ ફ્રીઝ કરી દીધા છે. તેમની પાસે અદાણી ગ્રુપની ચાર કંપનીઓના ૪૩,૫૦૦ કરોડ રુપિયાથી વધારે મૂલ્યના શેર છે. એનએસડીએલની વેબસાઈટ અનુસાર, આ અકાઉન્ટને ૩૧ મે અથવા તે પહેલા ફ્રીઝ કરવામાં આવ્યા હતા.
આ ત્રણની અદાણી એન્ટરપ્રાઈઝમાં ૬.૮૨ ટકા, અદાણી ટ્રાન્સમિશનમાં ૮.૦૩ ટકા, અદાણી ટોટલ ગેસમાં ૫.૯૨ ટકા અને અદાણી ગ્રીનમાં ૩.૫૮ ટકા ભાગીદારી છે. કસ્ટોડિનય બેન્કો અને વિદેશી રોકાણકારોને હેન્ડલ કરતી લૉ ફર્મ્સ અનુસાર, આ વિદેશી ફંડ્સને બેનિફિશિયલ ઓનરશિપ વિષે પૂરતી જાણકારી નહીં હોય, માટે તેમના અકાઉન્ટ ફ્રીઝ કરી દેવામાં આવ્યા છે. પ્રીવેન્શન ઓફ મની લોન્ડ્રિંગ એક્ટ અંતર્ગત બેનિફિશિયલ ઓનરશિપ વિષે પૂરી જાણકારી આપવી જરુરી છે.
એક અધિકારીના જણાવ્યા અનુસાર, લગભગ કસ્ટોડિયન પોતાના ક્લાયન્ટ્સને આ પ્રકારની કાર્યવાહી વિષે જાણકારી આપે છે, પરંતુ જો ફંડ આ બાબતે જવાબ નથી આપતા અથવા તેનું પાલન નથી કરતા તો તેમના અકાઉન્ટ ફ્રીઝ થઈ શકે છે. અકાઉન્ટ ફ્રીઝ થવાનો અર્થ છે કે, ફંડ વર્તમાન સિક્યોરિટી વેચી નથી શકતા અને નવી સિક્યોરિટી ખરીદી નથી શકતા. આ બાબતે એનએસડીએલ, સેબી અને અદાણી ગ્રુપને મોકલવામાં આવેલા ઈમેઈલનો કોઈ જવાબ નથી મળ્યો. ફંડિંગ કંપનીઓ સાથે સંપર્ક સાધી નથી શકાયો. આ ત્રણ ફંડ સેબીમાં વિદેશી પોર્ટફોલિયો ઈન્વેસ્ટર્સ તરીકે રજિસ્ટર્ડ છે અને મોરિશિયસથી કામકાજ ચાલી રહ્યું છે. આ ત્રણેયના પોર્ટ એક જ એડ્રેસ પર રજિસ્ટર્ડ છે અને તેમની કોઈ વેબસાઈટ નથી.
કેપિટલ માર્કેટ્સ રેગ્યુલરે ૨૦૧૯માં એફપીઆઈ માટે કેવાઈસી ડોક્યુમેન્ટેશનને પીએમએલએ અનુસાર કર્યુ હતું. ફંડ્સને ૨૦૨૦ સુધી નવા નિયમોનું પાલન કરવાનો સમય આપવામાં આવ્યો હતો. સેબી દ્વારા કહેવામાં આવ્યુ હતું કે, નવા નિયમોનું પાલન નહીં કરનારા ફંડ્સના અકાઉન્ટ ફ્રીઝ કરવામાં આવશે. નવા નિયમો અનુસાર એફપીઆઈને અમુક વધારાની જાણકારી આપવાની હતી, તેમાં કોમન ઓનરશિપનો ખુલાસો અને ફંડ મેનેજર્સ જેવા અગત્યના કર્મચારીઓની પર્સનલ ડિટેલ શામેલ હતી. સેબી અદાણી ગ્રુપની કંપનીઓના શેરના પ્રાઈસ મેનિપ્યુલેશનને પણ તપાસી રહી છે. ગયા વર્ષે આ કંપનીઓના શેરોમાં ૨૦૦થી ૧૦૦૦ ટકા સુધીની તેજી જોવા મળી હતી. આ બાબતના એક જાણકારે કહ્યું કે, સેબીએ ૨૦૨૦માં આ કેસની તપાસ શરુ કરી હતી જે હજી સુધી ચાલી રહી છે.
