નવી દિલ્હી,તા.૧૫
વિરાટ કોહલી અને અનુષ્કા શર્માને ત્યાં આ વર્ષના જાન્યુઆરી મહિનામાં દીકરી વામિકાનું આગમન થયું હતું. વામિકા પાંચ મહિનાની થઈ ગઈ છે, જો કે કપલમાંથી કોઈએ પણ હજી સુધી તેનો ચહેરો દેખાડ્યો નથી. તેથી જ વામિકા કોના જેવી દેખાય છે તે જાણવા માટે ફેન્સ આતુર છે. હાલમાં જ વિરાટ કોહલીની બહેન ભાવના કોહલી ધિંગરાએ વામિકા પર કરેલી કોમેન્ટ ઈન્ટરનેટ પર વાયરલ થઈ હતી. હવે તેણે ઈન્સ્ટાગ્રામ હેન્ડલ પર નિવેદન જાહેર કર્યું છે. ઈન્સ્ટાગ્રામ પર આસ્ક મી એનિથિંગ સેશન રાખ્યું હતું. જેમાં એક યૂઝરે પૂછ્યું હતું કે, શું તે વામિકાને મળી છે અને તે કોના જેવી દેખાય છે. જેના પર તેણે જવાબ આપ્યો હતો કે ’હા, હું તેને મળી છું અને તે એન્જલ છે’. હવે તેણે આ અંગે નિવેદન જાહેર કર્યું છે અને કહ્યું છે કે વિરુષ્કાએ પહેલાથી જ મીડિયાને વામિકાની પ્રાઈવસી જાળવવાની વિનંતી કરી છે. ભાવનાએ લખ્યું છે કે, ’મિત્રો, વિરાટ અને અનુષ્કાએ પહેલાથી જ વામિકાની તસવીરોથી દૂર રહેવાની વિનંતી કરી છે. કૃપા કરીને કોઈ સમાચારને પ્રોત્સાહન અથવા મનોરંજન ન આપો, જે સૂચવે છે કે તે કેવી દેખાય છે તેવો મેં ખુલાસો કર્યો છે. હું સંપૂર્ણ રીતે તેમના નિર્ણયનો આદર કરું છું અને હું પણ તેમ નહીં કરું. અગાઉ, વિરાટ કોહલીએ પણ ક્યુએન્ડએ સેશન દરમિયાન આ જ વાતનો ઉલ્લેખ કર્યો હતો. જ્યારે એક ફેને પૂછ્યું હતું કે, વામિકાનો અર્થ શું છે? તે કેમ છે? શું અમે તેની ઝલક જોઈ શકીએ પ્લીઝ?. તો કોહલીએ જવાબ આપતાં લખ્યું હતું કે, ’વામિકા એ મા દુર્ગાનું બીજું નામ છે. સોશિયલ મીડિયા શું છે તે વામિકા સમજે નહીં ત્યાં સુધી અમે તેને સોશિયલ મીડિયામાં સામે ન લાવવાનું નક્કી કર્યું છે. જાન્યુઆરી મહિનામાં વામિકાના જન્મ બાદ વિરાટ અને અનુષ્કાએ ફોટોગ્રાફર અને મીડિયાને તેમની દીકરીની તસવીરો ક્લિક ન કરવા માટે કહ્યું હતું. આ સાથે કપલે ફોટોગ્રાફર્સને ગિફ્ટ પણ મોકલી હતી. તો તેમણે પણ કપલે કહેલાનું પાલન કર્યું હતું. હાલ, વિરાટ કોહલી અને અનુષ્કા શર્મા તેમની દીકરી ’વામિકા’ વર્લ્ડ ટેસ્ટ ચેમ્પિયનશીપ ફાઈનલ માટે ઈંગ્લેન્ડમાં છે.
