(સંપૂર્ણ સમાચાર સેવા)
મુંબઈ, તા.૭
બોલિવુડ ફિલ્મોની સફળતાનો શ્રેય હંમેશા તેના લીડ એક્ટર અને એક્ટ્રેસને મળે છે. જો કે, ફિલ્મની સફળતામાં સાઈડ એક્ટર્સનો પણ મહત્વનો ફાળો હોય છે. સાઈડ એક્ટર્સને લોકો યાદ પણ કરતાં નથી અને તેનો ચહેરો સરળતાથી ભૂલી જાય છે. તેવા જ એક્ટર્સમાંથી એક છે સ્નેહલ ડાભી. સ્નેહલે આમ તો ઘણી ફિલ્મોમાં ભૂમિકા ભજવી છે પરંતુ તેને ઘણીવાર તેના કામનું મહેનતાણું મળ્યું નહીં. સ્નેહલે સુપરહિટ કોમેડી ફિલ્મ વેલકમમાં પણ કામ કર્યું હતું, જેની ફી તેને આજ સુધી મળી નથી.એન્ટરટેન્મેન્ટ વેબ પોર્ટલ બોલિવુડ હંગામા સાથે વાતચીત કરતાં સ્નેહલે જણાવ્યું કે, હવે ફિરોઝ નાડિયાદવાલા મને ૧૦ કરોડ રૂપિયા પણ આપશે તેમ છતાં તેમની ફિલ્મ નહીં કરું. ફિરોઝ ભાઈ વચન આપે છે અને પછી ફરી જાય છે. સ્નેહલ ડાભીએ નાડિયાદવાલાના પ્રોડક્શન હેઠળ બનેલી હેરા ફેરી, દીવાને હુએ પાગલ, વેકલમ તેમજ વેલકમ બેક જેવી ફિલ્મોમાં કામ કર્યું છે. ફિલ્મ વેલકમ કરવા માટે ફી ન મળી હોવાની વાતની પુષ્ટિ કરતાં સ્નેહલે કહ્યું મને આજ સુધી પૈસા મળ્યા નથી. ફિરોજ ભાઈ કહેતા રહ્યા કે, આપી દઈશ પૈસા. ત્યારબાદ મારો મોહભંગ થઈ ગયો કે આ કેવી ઈન્ડસ્ટ્રી છે.સ્નેહલ સાથે આવું પહેલીવાર નથી થયું. આ અંગે તેણે કહ્યું ’મેં એક ફિલ્મમાં એક્ટિંગ કરી હતી જેનું નામ હતું શેર. આ ફિલ્મમાં સંજય દત્ત અને વિવેક ઓબેરોય મુખ્ય ભૂમિકામાં હતા. મેં આ ફિલ્મમાં લખ્યું પણ હતું. અમે ફિલ્મનું શૂટિંગ ૫૦ ડિગ્રી તાપમાનમાં કર્યું હતું. ફિલ્મનું ૮૫ ટકા કામ પૂરું પણ થઈ ગયું હતું. અચાનક પ્રોડક્શન હાઉસે ફિલ્મને બંધ કરી દીધી. પૈસા ન મળ્યા ફિલ્મના. વિચારો મારી સ્થિતિ શું થઈ હશે. આવું જ વેલકમમાં પણ થયું. અમે લોકો ફિલ્મના શૂટિંગ માટે દુબઈ જતા હતા, પરંતુ તેના પૈસા મળ્યા નહીં.વેલકમની વાત કરીએ તો, આ કોમેડી ફિલ્મ તે સમયે સુપરહિટ રહી હતી. જેમાં નાના પાટેકર, અક્ષય કુમાર, ફિરોઝ ખાન, અનિલ કપૂર, કેટરીના કૈફ, મલ્લિકા શેરાવત તેમજ પરેશ રાવલ જેવા કલાકારો હતો. ફિલ્મમાં મલાઈકા અરોરાએ એક આઈટમ સોન્ગ પણ કર્યું હતું.
