(જી.એન.એસ)ટોક્યો,તા.૨૯
ઘણી વાર એવું કહેવામાં આવે છે કે સ્પોટ્ર્સ દ્વારા દુનિયાભરના લોકો એક થઈ શકે છે. અહીં કોઈપણ પ્રકારના ભેદભાવ માટે કોઈ સ્થાન નથી, પરંતુ ટોક્યો ઓલિમ્પિકમાં એક કેસ ફરીથી સામે આવ્યો છે, જેણે ફરી એક વખત જાતિવાદને હવા આપી છે. વરિષ્ઠ પત્રકાર ડિમોસ્થેનિસ કારમિરિસે ગ્રીસની ટીવી ચેનલ ’ઇઆરટી’ પર જાતિવાદી ટિપ્પણી કરી હતી, ત્યારબાદ ત્યાં હંગામો થયો હતો. કારમિરિસ અતિથિ તરીકે ટીવી પર લાઇવ હતા. તેમણે દક્ષિણ કોરિયાના ટેબલ ટેનિસ ખેલાડીઓ પર ખોટી ટિપ્પણી કરી. ખરેખર, દક્ષિણ કોરિયાના જિઓંગ યંગ-સિકે ગ્રીસના ખેલાડી પાનાગિઓટિસ ગિયોનિસને ટેબલ ટેનિસ મેન્સ સિંગલ્સના ત્રીજા રાઉન્ડમાં ૪-૩ થી પરાજિત કર્યો. તે પછી ડિમોસ્થેનેસ કારમિરિસનું આઘાતજનક નિવેદન આવ્યું. જ્યારે પત્રકાર ડિમોસ્થેનિસ કરમિરિસને દક્ષિણ કોરિયન ખેલાડી જિઓંગ યંગ-સિકની કુશળતા વિશે પૂછવામાં આવ્યું ત્યારે તેમણે તેના જવાબથી બધાને આશ્ચર્યચકિત કર્યા. તેમણે કહ્યું, ’કોરિયન લોકો ટેનિસ રમતા નથી, તેમની આંખો એટલી નાની છે કે તેઓ બોલને આગળ-પાછળ કેવી રીતે જુએ છે તે મને સમજાતું નથી.’ આટલું કહીને, કારમિરિસ લાઇવ ટીવી પર હસવા લાગ્યા. ડિમોસ્થેનિસ કારમિરિસનું આ જાતિવાદી નિવેદન સો.મીડિયા પર વાયરલ થવા લાગ્યું, લોકોએ આ પત્રકાર સામે પગલાં લેવાની માંગ શરૂ કરી દીધી. મામલો બગડતો જોઈ ચેનલ ઈઆરટીએ કારમિરિસને કાઢી મુક્યા હતા.
ગ્રીસની ચેનલ ઇઆરટીએ એક નિવેદન બહાર પાડતાં કહ્યું છે કે ’જાહેર ટેલિવિઝન પર જાતિવાદી ટિપ્પણીઓને કોઈ સ્થાન નથી. ઇઆરટી અને ડિમોસ્થેનિસ કારમિરિસ વચ્ચેનો કરાર આજે સમાપ્ત કરવામાં આવ્યો છે.
