(જી.એન.એસ)ટોક્યો,તા.૩૧
ભારતીય મહિલા હોકી ટીમે પુલ-એ સ્ટેજમાં પોતાની છેલ્લી હરિફાઇમાં સાઉથ આફ્રિકાને ૪-૩થી હરાવી દીધું છે. આથી ટીમની ક્વાર્ટર ફાઇનલમાં પહોંચવાની આશા યથાવત છે. આયરલેન્ડ અને ગ્રેટ બ્રિટનની વચ્ચે યોજાનાર મેચથી પુલ-એમાં પહોંચનાર ટીમોનો નિર્ણય થશે. ભારત માટે વંદના કટારિયાએ ૩ ગોલ ફટકાર્યા. વંદના ભારતની પહેલી મહિલા હોકી ખેલાડી છે જેણે ઓલિમ્પિક મેચમાં ગોલની હેટ્રિક કરી હોય. ભારતની મહિલા ટીમે આક્રમક શરૂઆત કરી હતી. મેચની ચોથી મિનિટમાં જ નવનીત કૌરની બાજુમાં વંદનાએ ગોલ ફટકારી ભારતને ૧-૦થી આગળ કરી દીધું. પહેલું ક્વાર્ટર ખત્મ થતા પહેલાં સાઉથ આફ્રિકાની ટીમે ગોલ કરી બરાબરી કરી લીધી. બીજા ક્વાર્ટરમાં વંદનાએ એક ગોલ કરી ટીમને ફરી ૨-૧થી આગળ કરી દીધી. સાઉથ આફ્રિકાએ બીજા ક્વાર્ટરની છેલ્લી મિનિટમાં ગોલ કરી ૨-૨ની બરાબરી કરી. ત્રીજા ક્વાર્ટરમાં રાની રામપાલની પાસે નેહાત ગોયલે ગોલ ફટકાર્યો. તો સાઉથ આફ્રિકાએ ત્રીજા ક્વાર્ટરમાં ફરી એકવખત ગોલ ફટકારી ૩-૩થી બરાબરી કરી દીધી. ત્યારબાદ વંદનાએ ૪૯મી મિનિટમાં પોતાનો ત્રીજો અને ટીમ માટે ચોથો ગોલ ફટકારી ભારતને જીત અપાવી દીધી.
