આમ આદમી પાર્ટી અને બહુજન સમાજ પાર્ટી બેઠકમાં ન જોડાઇ, રાહુલ ગાંધી બેઠક બાદ વિપક્ષ નેતાઓ સાથે સંસદમાં સાયકલ લઇને પહોંચ્યા : રાહુલ ગાંધીનું બ્રેકફાસ્ટ પોલિટિક્સઃ ૧૪ વિપક્ષી પાર્ટીઓ સામેલ થઇ
ન્યુ દિલ્હી,તા.૩
વિપક્ષી સાંસદો સાથે નાસ્તા બાદ રાહુલ ગાંધી આજે સાયકલ પર સવાર થઇને સંસદ પહોંચ્યા હતા. રાહુલ ગાંધીની આ સાયકલ માર્ચ બળતણના વધેલા ભાવ સામે વિરોધ હતો. રાહુલ ગાંધીની આ સાયકલ માર્ચમાં વિપક્ષના કેટલાય સાંસદ હાજર હતા. આ પહેલાં દિલ્હીની એક ક્લબમાં રાહુલ ગાંધી સાથે નાસ્તા માટે ૧૪ વિપક્ષી પાર્ટીના નેતા પહોંચ્યા હતા પરંતુ આમ આદમી પાર્ટી અને બહુજન સમાજ પાર્ટીના સાંસદ રાહુલ ગાંધી સાથે નાસ્તા માટે પહોંચ્યા નહોતા. પેગાસસ જાસૂસી મામલે કોંગ્રેસના પૂર્વ અધ્યક્ષ રાહુલ ગાંધીએ વિપક્ષ નેતાઓની સાથે મળી સરકાર સામે કેવી રીતે કાર્ય કરવું તે રણનીતિ પર ચર્ચા કરી. રાહુલ ગાંધીએ આપેલા આમન્ત્રણને માન આપી પ્રમુખ વિપક્ષી દળોના નેતા નાસ્તા પર કોન્સ્ટિટ્યુશન ક્લબના ભેગા થયા હતા. રાહુલ ગાંધી ઉપરાંત રાજ્યસભામાં વિપક્ષના નેતા મલ્લિકાર્જુન ખડગે, લોકસભામાં કોંગ્રેસના નેતા અધીર રંજન ચૌધરી, તૃણમૂલ કોંગ્રેસના નેતા કલ્યાણ બેનર્જી, શિવસેનાના નેતા સંજય રાઉત, આરજેડીના મનોજ ઝા અને અન્ય ઘણા પક્ષોના નેતાઓએ આ બેઠકમાં હાજરી આપી હતી. કોંગ્રેસ, એનસીપી, શિવસેના, આરજેડી, એસપી, સીપીઆ્રૂએમ), સીપીઆઇ, આઇયુએમએલ, ક્રાંતિકારી સમાજવાદી પાર્ટી કેરળ કોંગ્રેસ, ઝારખંડ મુક્તિ મોરચા, નેશનલ કોન્ફરન્સ, ટીએમસી અને લોકતાંત્રિક જનતા દળના નેતાઓએ આ બેઠકમાં હાજરી આપી હતી. બીજી બાજુ, બેઠક બાદ રાહુલ ગાંધી વિપક્ષના નેતાઓ સાથે સંસદમાં સાઈકલ પર ગયા હતા.વિપક્ષી દળના નેતાઓ સાથે બેઠકમાં રાહુલ ગાંધીએ કહ્યું હતું કે, ’મારા વિચાર મુજબ સૌથી મહત્વપૂર્ણ વાતએ છે કે આપણે બધા એક સાથે રહીયે. આ અવાજ જેટલી એક સાથે રહશે, એટલી જ શક્તિશાળી થશે. આ સાથે ભાજપ અને આરએસએસ માટે તેને દબાવવી મુશ્કેલ થશે. ઉલ્લેખનીય છે કે, વિપક્ષી નેતાઓ સાથે નાસ્તા બેઠક તેવા સમયે મળી જ્યારે સંસદના બન્ને ગૃહોમાં વિપક્ષ દ્વારા હંગામો કરાઇ રહ્યો છે. ૧૯ જુલાઇથી મોનસૂન સત્રની શરૂઆત થઇ, પરંતુ અત્યાર સુધી બન્ને ગૃહની કાર્યવાહી ખોરવાઇ છે. વિપક્ષી પાર્ટીઓનું કહેવું છે કે, પેગાસસ જાસૂસી મુદ્દે પહેલાં ચર્ચા કરવા માટે સરકાર તૈયાર થયા બાદ જ સંસદમાં મડાગાંઠનો અંત આવશે. સંસદીય કાર્ય મંત્રી પ્રહ્લાદ જોશીએ વિપક્ષની માંગ રદ કરતાં શુક્રવારે લોકસભામાં કહ્યું હતું કે, આ કોઇ મુદ્દો નથી.
