(સંપૂર્ણ સમાચાર સેવા) નવી દિલ્હી, તા.૯
નીરજ ચોપરાને હવે કોઈ ઓળખની જરુર નથી. અત્યાર સુધી ઘણાં ઓછા લોકો ભાલા ફેંકની રમતમાં રસ ધરાવતા હતા પરંતુ હવે લોકો આ રમત વિષે જાણવામાં રસ દાખવી રહ્યા છે. ૨૩ વર્ષના જેવલિન થ્રોઅર નીરજ ચોપરાએ ગોલ્ડ મેડલ જીતીને ઈતિહાસ રચ્યો છે. તે ઓલિમ્પિકમાં ટ્રેક એન્ડ ફીલ્ડમાં મેડલ જીતનાર પહેલા ભારતીય બની ગયો છે. તેણે ૮૭.૫૮ મીટર દૂર ભાલો ફેંક્યો હતો. નીરજ ચોપરાની ફીલ્ડ લાઈફ વિષે તો લોકો જાણે છે, પરંતુ હવે લોકોને તેના અંગત જીવન વિષે જાણવાની પણ આતુરતા છે. મેડલ જીત્યા પછી નીરજ ચોપરા પર શુભકામનાઓનો વરસાદ થઈ રહ્યો છે. ફિલ્મ ઈન્ડસ્ટ્રી હોય કે ખેલજગતના લોકો હોય, તમામ લોકો નીરજને અભિનંદન પાઠવી રહ્યા છે. તાજેતરમાં જ મહાન ક્રિકેટર કપિલ દેવે નીરજ ચોપરા સાથે વાતચીત કરી હતી. કપિલ દેવે નીરજ ચોપરાને અમુક એવા પ્રશ્નો કર્યા કે સાંભળીને નીરજ શરમાઈ ગયો હતો. કપિલ દેવે એક સમાચાર ચેનલના માધ્યમથી નીરજ સાથે વાત કરી હતી. કપિલ દેવે નીરજ ચોપરાને તેના લગ્નના પ્લાન વિષે પ્રશ્ન પૂછ્યો હતો. કપિલે કહ્યું કે, તમારા માતા-પિતા કહી રહ્યા છે કે તમારે હજી બે ગોલ્ડ મેડલ લાવવાના છે. આનો અર્થ છે કે હજી ૭-૮ વર્ષ તમારે ફીલ્ડ પર મહેનત કરવી પડશે. આનો અર્થ એ પણ છે કે અત્યારે તમારો લગ્ન કરવાનો કોઈ ઈરાદો નથી. શું તમને આ મંજૂર છે? આ સવાલ પર શરમાઈને નીરજ ચોપરાએ જવાબ આપ્યો કે, મને ખબર નથી, પરંતુ જ્યારે સમય આવશે ત્યારે લગ્ન પણ થઈ જશે. અત્યારે સંપૂર્ણ ધ્યાન સ્પોર્ટસ પર કેન્દ્રિત છે. જે થવાનું છે તે થઈને રહેશે. કપિલ દેવે નીરજને પૂછ્યું કે, એવું તો નથી કે તમે કોઈ ફ્રેન્ડ રાખી હોય? કે પછી માતા-પિતા પર નિર્ણય આધારિત છે? માતાપિતા કહેશે તેની સાથે જશો? નીરજે આ સવાલ પર પણ હસીને કહ્યું કે, હમણાં તો ધ્યાન ગેમ પર છે. આવનારા સમયમાં કંઈ પણ થઈ શકે છે. માતા-પિતાને જે સારું લાગશે તે પણ ઠીક છે. મને કોઈ સારું લાગશે તો હું વાત કરવાનો પ્રયત્ન કરીશ.
