ડી ડિવિઝન પોલીસે મૃતદેહનો કબજો લઈ પીએમ માટે હોસ્પિટલમાં મોકલી આપ્યો
ભાવનગર શહેરના ચાવડીગેટ વિસ્તારમાં રહેતાં 28 વર્ષીય શ્રમજીવી યુવાનનો મૃતદેહ બોરતળાવમાંથી તરતો મળી આવતા ફાયરબ્રિગેડના જવાનોએ લાશને પાણી માથી બહાર કાઢી પોલીસને સોંપતા ડી ડિવિઝન પોલીસની ટીમે લાશનો કબ્જો લઈ મોતનું કારણ જાણવા પીએમ માટે સર.ટી હોસ્પિટલમાં મોકલી આગળની કાર્યવાહી હાથ ધરી હતી.
સમગ્ર બનાવ અંગે પોલીસ સૂત્રો પાસેથી જાણવા મળતી માહિતી મુજબ આજરોજ શહેરના ગૌરીશંકર સરોવર(બોરતળાવ)થી કોઈ રાહદારીએ ફાયરબ્રિગેડને જાણ કરી હતી કે, બોરતળાવમા એક લાશ તરતી જોવા મળી રહી છે. જે માહિતી મળતાં જ ફાયરબ્રિગેડનો કાફલો બોરતળાવ ખાતે દોડી આવ્યો હતો અને તરવૈયાઓએ લાશને કિનારે લાવી ડી-ડીવીઝન પોલીસને હવાલે કરતાં પોલીસે લાશનો કબ્જો લઈ પ્રાથમિક તપાસ હાથ ધરી હતી. જેમાં મૃતકના શરીર પર કોઈ ઈજા કે હથિયાર ના ઘા ના નિશાન જોવા મળ્યાં ન હતાં તથા તેનાં પેન્ટના ખીસ્સામાં થી મળેલ ઓળખ કાર્ડ આધારે મૃતક શહેરના ચાવડીગેટ વિસ્તારમાં રહેતો રાજેશ ઘનશ્યામભાઈ વાઘેલા ઉ.વ.28 હોવાનું ખુલવા પામ્યું હતું. આથી પોલીસે મૃતકના વાલી-વારસદારોને બોરતળાવ બોલાવી પ્રારંભિક પુછપરછ કરી મોતનું કારણ જાણવા લાશને પીએમ માટે સર.ટી હોસ્પિટલમાં ખસેડી વધુ તપાસ હાથ ધરી હતી આ બનાવમાં મૃત્યુ નું કારણ અકબંધ રહેવા પામ્યું હતું.
