હોસ્પિટલોમાં બાયોમેડિકલ વેસ્ટ અંગે ખાસ પ્રકારની ગાઇડલાઇન હોય છે તે પ્રમાણે જ હોસ્પિટલ સંચાલકોએ વેસ્ટનો નિકાલ કરવાનો હોય છે ગમે ત્યાં કે સામાન્ય કચરાપેટીમાં પણ તે ફેંકી દેવાતો નથી ત્યારે બે દિવસ પહેલા સે-૧૬ની ખાણીપીણી બજાર પાસે ખુલ્લામાં જ બાયોમેડિકલ વેસ્ટ વેરવિખેર જાહેરમાં જ જોવા મળ્યો હતો જેને લઇને સ્થાનિક તંત્ર દોડતું થઇ ગયું હતું જો કે, નજીકની હોસ્પિટલોમાં તપાસ કરીને આ બેજવાબદાર સંચાલકને નોટિસ પણ ફટકારવામાં આવી છે.
ગાંધીનગર સિવિલ હોસ્પિટલમાં મેડિકલ વેસ્ટનો યાગ્ય અને પધ્ધતિસરનો નિકાલ કરવામાં આવતો ન હતો જેને લઇને પ્રદુષણ નિયંત્રણ બોર્ડે પણ સિવિલ સત્તાવાળાઓના કાન આંબળ્યા છે ત્યારે પાટનગરની ખાનગી હોસ્પિટલ અને ક્લિનીક પણ મેડિકલ વેસ્ટના નિયમનો સરેઆમ ભંગ કરે છે જે અંગે તાજેતરમાં સે-૧૬ ચોપાટી પાસે ખુલ્લામાં સરીંજ સહિત અન્ય બાયોમેડિકલ વેસ્ટ કચરામાં પડયો હતો જાગૃત નાગરિકે ધ્યાન દોરતા સ્થાનિક તંત્ર દોડતું થઇ ગયું હતું અને આ વેસ્ટ કોનો છે તે પણ નજીકની હોસ્પિટલોમાં તપાસ કરીને જાણી દેવામાં આવ્યું હતું જેમાં આ બાયોમેડિકલ વેસ્ટ નજીકની જ ઇલા મેટરનેટી હોમ્સનો હોવાનું સામે આવ્યું હતું અને તાત્કાલિક કોર્પોરેશને આ બેજવાબદાર હોસ્પિટલના સંચાલકને નોટિસ આપી હતી જેમાં આવી રીતે વેસ્ટનો નિકાલ નહીં કરવા માટે પણ તેમને સુચના આપવામાં આવી છે. તો ગાંધીનગરના સેક્ટર-૭ સહિત સે-૧૬માં પણ ઘણી જગ્યાએ આવી રીતે બાયોમેડિકલ વેસ્ટનો જાહેરમાં નિકાલ થતો હોય છે જે જોખમી હોવાની સાથે રોગચાળો ફેલાવવા માટે પણ મહત્વનું ગણી શકાય છે જેથી કરીને આ બાબતે ગંભીરતાથી લઇને કોર્પોરેશન દ્વારા આગામી દિવસોમાં ખાસ ડ્રાઇવ ચલાવશે.
