વિશ્વની સૌથી ઉંચી પ્રતિમાને સૌરાષ્ટ્રવાસીઓ પણ સરળતાથી જોવા માટે પહોંચી શકે તે માટે એસટી વિભાગ દ્વારા એક સ્પેશિયલ વોલ્વો બસ ચલાવવાનો નિર્ણય લેવામાં આવ્યો છે. સૌરાષ્ટ્રથી સ્ટેચ્યૂ ઓફ યુનિટી સુધી આ બસ દોડશે. દર શનિવાર અને રવિવારે આ બસ રાજકોટથી ઉપડશે. ત્યારે અહીંયા સૌથી મહત્વની વાત એ છે કે સરદાર પટેલની વિશ્વની સૌથી ઉંચી પ્રતિમાની મુલાકાત લેવા માટે સૌરાષ્ટ્રવાસીઓને વાહન બદલી-બદલીને આવવાની જરુર નહી પડે. એસટી વિભાગ દ્વારા જે રાજકોટથી સ્ટેચ્યુ ઓફ યુનિટી સુધીની સીધી બસ મુકવામાં આવી છે તેનો લાભ લાખો લોકો લઈ શકશે.
આ સેવા આવતા અઠવાડિયાથી જ શરૂ કરવામાં આવશે. હાલ ગુજરાતના અન્ય વિસ્તારો તેમજ બીજા રાજ્યના લોકો પણ સ્ટેચ્યૂ ઓફ યુનિટીની મુલાકાત લઈ રહ્યા છે, ત્યારે સૌરાષ્ટ્રના લોકોને પણ સગવડતા મળી રહે તે હેતુથી આ મહત્વપૂર્ણ નિર્ણય કરાયો છે.
