શહેરના જુનાબંદર રોડ પર આવેલ લાકડાના ગોડાઉનમાં મોડીસાંજે વિકરાળ આગ ભભૂકી ઉઠી હતી. બનાવની જાણ થતા ફાયરસ્ટાફ ઘટના સ્થળે દોડી જઈ આગ ઓલવવા તજવીજ હાથ ધરી હતી.
પ્રાપ્ત વિગત મુજબ, શહેરના જુનાબંદર રોડ પર આવેલ ઈબ્રાહીમભાઈ તાજભાઈ વોરાના લાકડાના ગોડાઉનમાં મોડીસાંજે આગનો બનાવ બનવા પામ્યો હતો. જોતજોતામાં આગે વિકરાળ સ્વરૂપ ધારણ કર્યુ હતું. બનાવ બનતા લોકોના ટોળા એકઠા થયા હતા અને ફાયરબ્રિગેડ સ્ટાફ ઘટનાસ્થળે દોડી જઈ ચાર ગાડી પાણીનો છટકાવ કરી આગને ઓલવવાની કામગીરી હાથ ધરી હતી. આગમાં લાખો રૂપિયાનું નુકશાન થયાનું ચર્ચાઈ રહ્યું હતું. આગનું કારણ કે નુકશાનીનો સત્તાવાર આંકડો જાણવા મળ્યો ન હતો.
