(જી.એન.એસ)ન્યુ દિલ્હી,તા.૧૪
રમત જગતની દિગ્ગજ હસ્તીઓ સાથે બોલિવૂડ સુંદરીઓનો પ્રેમ કોઇ નવી વાત નથી. સો.મીડિયા પર આજકાલ એક કપલનું નામ ભારે ચર્ચામાં છે. દિગ્ગજ ટેનિસ ખેલાડી લિએન્ડર પેસ અને અભિનેત્રી કિમ શર્મા ગોવામાં એક સાથે સમય ગાળતાં જોવા મળ્યા છે. ઇન્ટરનેટ પર ફોટા વાયરલ થતાંની સાથે જ હવે અફવાઓનું બજાર ગરમ થઈ ગયું છે. ગોવામાં એક રેસ્ટોરન્ટે તેના સોશિયલ મીડિયા એકાઉન્ટ પરથી લિએન્ડર-કિમના ફોટા શેર કર્યા છે. બંનેની કેમિસ્ટ્રી તસવીરોમાં જોઈ શકાય છે. રોમેન્ટિક શૈલીમાં, જેમાં બંને પોઝ આપી રહ્યા છે, આ તસવીરો જોતા તે સમજી શકાય છે કે આ સંબંધ ટૂંક સમયમાં દુનિયા સામે સત્તાવાર બનવા જઈ રહ્યો છે. લિએન્ડર પેસ અને કિમ શર્મા બંને કેટલાયે અફેર કરી ચુક્યા છે. ઓલિમ્પિક્સ સહિત ઘણા ગ્રાન્ડ સ્લેમ જીતનાર લિએંડરે લાંબા સમયથી બોલિવૂડ અભિનેત્રી મહિમા ચૌધરીને ડેટ કરી હતી, જ્યારે સંજય દત્તની પૂર્વ પત્ની અને મોડલ રિયા પિલ્લઈ સાથે પણ તેના સંબંધ હતા. બંનેને એક પુત્રી પણ છે. બાદમાં અણબનાવ બાદ પોલીસ કેસ પણ થયો હતો. કિમ તેની બોલિવૂડ કારકિર્દી કરતા વધારે તેની પર્સનલ લાઇફમાં થતી બબાલને લઇને ચર્ચામાં રહે છે. ક્રિકેટર યુવરાજ સિંહ સાથેના અફેર, પતિથી છૂટાછેડા અને ઘરેલું કામવાળી સાથે મારપીટને કારણે કિમ ચર્ચામાં છવાઇ હતી. મુંબઈ છોડીને કેન્યામાં લગ્ન કર્યા પછી સ્થાયી થયેલી કિમ હવે ભારત પાછી આવી ગઇ છે. બધાની નજર આ તરફ રહેશે કે હવે ૪૧ વર્ષની કીમ અને ૪૮ વર્ષના લિએન્ડર પેસ વચ્ચે કેવો અને કેટલો સંબંધ રહેશે.
