સંદીપ શર્માએ ગર્લફ્રેન્ડ તાશા સાથે લગ્ન કર્યા,

મુંબઈ,તા.૨૦
સનરાઇઝર્સ હૈદરાબાદના ક્રિકેટર સંદીપ શર્મા પોતાની લોન્ગ ટાઇમ ગર્લફ્રેન્ડ તાશા સાત્ત્વિક સાથે લગ્નના બંધનમાં બંધાયો છે. મહત્ત્વપૂર્ણ છે કે IPL ૨૦૨૧નો બીજો ફેઝ ૧૯ સપ્ટેમ્બરથી શરૂ થવા જઇ રહ્યો છે, પરંતુ આની પહેલાં SRH ના ફાસ્ટ બોલર સંદીપ શર્માએ પોતાની જિંદગીની નવી ઈનિંગ શરૂ કરી દીધી છે. સંદીપ શર્માએ સોશિયલ મીડિયામાં ફોટો શેર કરીને પોતાના ફેન્સને લગ્ન સંબંધી જાણકારી આપી હતી. તેની IPL ટીમ SRH એ પણ ટિ્‌વટર પર તાશા અને સંદીપના લગ્ન પ્રસંગની તસવીર શેર કરીને જિંદગીની નવી ઈનિંગ માટે શુભેચ્છાઓ પાઠવી હતી. એટલું જ નહીં, હૈદરાબાદની ટીમે તાશાનું SRH ફેમિલીમાં સ્વાગત કર્યું હતું.સંદીપ શર્મા અને તાશા સાત્ત્વિકે સાઉથ ઈન્ડિયન વેડિંગ આઉટફિટમાં લગ્ન કર્યાં હતાં. સંદીપે સફેદ ધોતી અને કુરતો પહેર્યો હતો, જ્યારે તાશાએ ઓરેન્જ-રેડની કાંજીવરમ સાડી પહેરી હતી. આ બંને જોડીનો સાઉથ ઈન્ડિયન ટ્રેડિશનલ લુક અત્યારે ચર્ચામાં છે. સનરાઇઝર્સ હૈદરાબાદની ટીમ IPL ૨૦૨૧માં ભાગ લેવા માટે ૩૧ ઓગસ્ટે UAE જશે. જો પહેલા ફેઝમાં ટીમના પ્રદર્શનની વાત કરીએ તો SRH ની ટીમ ૭ મેચમાંથી માત્ર ૧ જ જીતી શકી છે. અત્યારે તે પોઇન્ટ ટેબલમાં પણ સૌથી છેલ્લા ક્રમે હોવાથી IPL ફેઝ-૨માં બાઉન્સ બેક કરવું આ ટીમ માટે અનિવાર્ય બની રહેશે.